Kjo është e vërteta
Kurani eshte Univers i heshtur,ndersa Universi eshte Kurani qe flet!

Callma e tregtarit

Ibnu Hazmi, në librin e tij “Gjerdani i pëllumbeshës” rrëfen një ngjarje të cilën e ka parë me sytë e tij. Ai thotë:”Në Andaluzi, jetonte një tregtar shumë i njohur. Ai ishte në rivalitet me katër tregtarë të tjerë, të cilët e kishin marrë inat dhe kishin vendosur t’ia nxijnë jetën. Një mëngjes të bukur, ai doli nga shtëpia drejt dyqanit të tij, i veshur me një xhybe dhe një çallmë të bardhë që i shkëlqente.
Kolegu tregtar i parë që i doli para e përshëndeti, i hodhi një sy çallmës së tij dhe i tha:”Sa e bukur qenka kjo çallma e verdhë që ke vënë mbi kokë.”
Tregtari ia ktheu:”Ç’thua more? Mos je verbuar? Çallma ime është e bardhë!” Kolegu i tha:”Jo, jo, është e verdhë.”
Tregtari e la dhe u largua. Disa hapa më tej, e takoi i dyti dhe pasi e përshëndeti, i hodhi një sy çallmës dhe i tha:”Sa bukur qenke veshur sot! Hajde veshje hajde! Sidomos kjo çallma jeshile ta hiqka trurin!”
Tregtari i tha:”Ik ore tutje, çallma ime është e bardhë, more vesh?”
Mandej, ai u largua por vesveset filluan ta shqetësojnë, saqë herë pas here, hiqte çallmën dhe sigurohej nëse është vërtet e bardhë apo jo. Pasi mbërriti në dyqanin e tij dhe e çeli, ia behu i treti i cili i tha:”O filan! Sa hijshëm qenke veshur sot! Këto rroba të shkokan shumë. Sidomos çallma ngjyrë blu që paske vënë mbi kokë.”
Tregtari e hoqi çallmën që të sigurohej për ngjyrën e saj dhe pasi fërkoi sytë, i tha:”Jo more burrë, çallma ime është e bardhë!”
Kolegu ia ktheu:”Jo jo, çallma është ngjyrë blu, ama është shumë e bukur. Por ti s’ke përse të mërzitesh.” Pastaj u largua në punën e vet.
Sakaq tregtari i tha nga pas:”Çallmën e kam të bardhë, more vesh? Të bardhë.” Dhe herë pas here e hiqte dhe sigurohej për ngjyrën. Ai u ul në vendin e tij, por vesveset nuk e linin rehat. Në një moment vjen i katërti, i cili pasi e përshëndet i thotë:”Mashalla, mashalla! Ku e paske blerë këtë çallmë të kuqe more?”
Tregtari, duke u përtypur ia ktheu:”Çfarë thua more byrazer?! Çallmën e kam ngjyrë blu.” Tjetri i tha:”Jo, jo, çallmën e ke ngjyrë të kuqe.”
Tregtari ia priti përsëri:”Jo, e kam ngjyrë blu. Jo, e kam të bardhë fare. Jo, jo, është blu, e zezë...” Pastaj qeshi, më vonë bërtiti, zuri të qajë dhe të hidhet përpjetë.
Tregon Ibnu Hazmi:”Që nga ajo ditë, e shihnim të rrjedhur nga trutë rrugëve të Andaluzisë, ku e qëllonin fëmijët me gurë.”
Nëse këta persona me metoda primitive arritën ta nxjerrin burrin e botës nga natyra e tij, madje e bënë ti rrjedhin trutë, ç’mund të themi për energjitë e tua të cilat burojnë nga drita e shpalljes hyjnore? Ç’mund të themi për vullnetin dhe besimin e besimtarit që e përdor për të fituar kënaqësinë e Zotit?!
Prandaj, ato aftësi që ke fituar vëri në praktikë që të jetosh i lumtur. Nëse më thua:”Nuk mundem” të them:”Provoje!” Nëse më thua:”Nuk di” të them:”Mëso!”
Thotë profeti Muhamed a.s:”Dija vjen me të mësuar, kurse urtësia dhe mençuria me të ushtruar.”
Hero i vërtetë është ai që nga aftësia për të zhvilluar veten, kapërcen në aftësi për të zhvilluar të tjerët, madje, për ti ndryshuar ata.


This website was created for free with Own-Free-Website.com. Would you also like to have your own website?
Sign up for free